Thursday, August 4, 2011

''ஹேர்டை'' வீட்டுக்குள் இருக்கும் விஷம்





இப்போதெல்லாம் எல்லார் வீட்டு பாத்ரூமிலும் சோப்பு, ஷாம்பூ, வரிசையில் இடம்பிடிக்கும் மற்றொரு பொருள் ஹேர்டை. வாலிபர்கள் முதல் வயோதிகர்கள் வரை எல்லோரும் உபயோகிக்கிறார்கள். இதன் பின் விளைவுகள் பற்றி யாருக்காவது தெரியுமா?

Monday, August 1, 2011

''மயக்கம் ''அறியாமல் நீங்கள் நிகழ்த்தும் மரணங்கள்!




சமீபத்திய இரண்டு சம்பவங்கள் (மரணங்கள்) எனக்கு இந்த பதிவை எழுத தூண்டியது.

ஒன்று.

நான் அடிக்கடி செல்லும் எனது நண்பரின் எதிர் வீட்டு பாட்டி. அறுபது வயதை நெருங்கும் அவருக்கு சுகர், பிரஷர், இதய நோய், போன்ற எதுவும் கிடையாது. நல்ல ஆரோக்கியமானவர். ஒருநாள் காலைமுதல் உண்ணா நோன்பு இருந்தவர், மாலை வெந்நீரில் குளித்துக் கொண்டிருக்கும் போது, இரத்த அழுத்தம் குறைந்து, மயக்கம் ஏற்பட்டு கீழே விழுந்திருக்கிறார். சப்தம் கேட்டு பாத்ரூமுக்குள் சென்ற மகள் (அவர் ஒரு கல்லூரி பேராசிரியை) அவரை தூக்கி உட்காரவைத்துவிட்டு மற்றவர்களை கூப்பிட்டிருக்கிறார். தற்செயலாக சென்ற நான் பார்க்கும் போது பாட்டி இறந்திருந்தார்.

Tuesday, July 26, 2011

சிக்கனா? மட்டனா? எது நல்லது...........




அசைவ உணவுகளில் முதல் இரண்டு இடங்களில் இருப்பது சிக்கனும் மட்டனும் தான். இதில் உடலுக்கு நல்லது எது என்ற விளக்கமே இந்த பதிவு.
பொதுவாக பலர் மட்டனில் கொழுப்பு அதிகம் என்று சிக்கனை அதிகமாக சாப்பிடுகிறார்கள். இது சரிதானா?

Friday, July 15, 2011

தங்கபாலு vs 'பவர் ஸ்டார்' காமெடி பே( ா‍)ட்டி

 

தமிழ் நாட்டின் சிறந்த நகைசுவையாளர்களான காங்கிரஸ் தலைவர் தங்கபாலுவும், 'பவர் ஸ்டார்' டாக்குடர் சீனிவாசனும், விகடன் வாரஇதழுக்கு பேட்டியளித்துள்ளார்கள். அதில் எது அதிகமாக சிரிப்பை வரவைத்தது என்பதை உங்கள் வாக்கெடுப்புக்கு விட்டுவிடுகிறேன்

Monday, June 27, 2011

இயக்குனர் பாலாவின் வாய்கொழுப்பு

      


          அவன் இவன் படத்தில் தீர்த்தபதி (ஹைனஸ்) என்ற ஜமிந்தார் கேரக்டர் வரும். படத்தில் வரும் சிருவன் கூட ''யோவ் ஹைனஸூ'' என்று மரியாதையாக (!) அழைப்பான். கடைசியில் வில்லன், அம்மணமாக்கி அடித்துக்கொல்வான். இவ்வாறு சிறந்த (!) முறையில் அந்த கேரக்டர் அமைக்கப்பட்டிருக்கும்.

         மற்றொரு காட்சியில் ஆர்யா, சொரிமுத்தையனார் சாமி என்று சொல்லும் போது குரங்கு சொறிவது செய்கை காட்டுவர்.

         இது போன்ற கேனத்தனமான காட்சிகளால் நெல்லை மாவட்ட மக்கள் கொதிப்பாகியுள்ளனர். 'சொரிமுத்து அய்யனார் பக்தர்கள்’ என்ற பெயரில் ஒட்டப்பட்டு இருக்கும் கண்டன போஸ்டர்களில், 'சிங்கம்பட்டி ஜமீன்தாரையும், சொரிமுத்து அய்யனார் கோயிலையும் அவமதிக்கும் காட்சிகளை உடனடியாக நீக்க வேண்டும். படத்தை இயக்கிய பாலா பகிரங்க மன்னிப்பு கேட்க வேண்டும்’ எனத் தெரிவிக்கப்பட்டு உள்ளது. என்னதான் காமெடிக்காக என்றாலும் கூட லட்சக்கணக்கான பக்தர்கள் வணங்கும் கடவுளையும், மதிக்கும் ஜமீன்தாரையும் அவமதிப்பது சரிதானா?

      சிங்கம்பட்டி ஜமீன்தார் முருகதாஸ் தீர்த்தபதியை எனக்கு நன்கு தெரியும். இன்றும் மக்களிடம் நன்மதிப்போடும், செல்வசெழிப்போடும் வாழ்ந்து வருபவர். நெல்லை மாவட்டத்தின் பல்வேறு பகுதிகளிலும், சிங்கம்பட்டி ஜமீன் மூலமாக மருத்துவ மனைகள், கல்விக்கூடங்கள் அமைக்கப்பட்டு, பராமரிக்கப்பட்டு வருகின்றன.

     அவரிடம் இதுபற்றி கேட்ட போது
       ''சிங்கம்பட்டி சமஸ்தானத்துக்கு, ஆயிரம் வருடப் பாரம்பரியம் உண்டு. நாங்கள் சாதி, மத வேறுபாடு பார்க்காமல் எல்லோரிடமும் அன்பாக இருப்பதால், மக்களும் எங்கள் மீது பிரியமாக இருக்காங்க. எனக்கு 80 வயதாகிறது. ஒரு துறவியின் மனநிலைக்குப் போயிட்டேன். அதனால், என் மீது பூவை எறிந்தாலும், கல்லை வீசினாலும் கவலைப்பட மாட்டேன். படத்தில் என்னைத் தவறாக விமர்சனம் செஞ்சிருப்பதாக பலரும் சொன்னதை நான் கண்டுக்கலை. ஆனால், என் மீது பாசம் வைத்திருக்கும் மக்கள் ரொம்பவும் கோபத்தில், வேகத்தில் இருக்காங்க. அதனால் இந்தப் பிரச்னை பெருசாகிருச்சு.என்னையும் இந்த ஜமீனையும் பற்றி முன்பின் அறியாதவர்கள் தவறு செய்ய வாய்ப்பு இருக்கு. ஆனா, பாலா எனக்கு உறவுக்காரப் பையன். படம் எடுக்கிற துக்கு முன்னால், என்னிடம் ஒரு வார்த்தை கலந்து பேசி இருக்கலாம். இப்போது இந்த அளவுக்கு ஆன பிறகாவது என்னிடம் பேசி இருக்கலாம். அல்லது அந்தக் கதாபாத்திரம் 'கற்பனையானது’னு கார்டு போட்டு இருக்கலாம். இது எதையும் செய்யலை. அப்படின்னா திட்டமிட்டே இதை செஞ்சதாதானே அர்த்தம். கொதிச்சுப்போன பலர் போராட்டம் நடத்த என்னிடம் அனுமதி கேட்டாங்க. நான்தான்  அவங்களைத் தடுத்தேன். ஆனாலும், மதுரையில் இந்தப் படத்துக்கு தடை கோரி 150 பெண்கள் ரத்தக் கையெழுத்துப் போட்டு முதல்வருக்கு மனு அனுப்பி இருக்காங்க. நான் எவ்வளவோ வற்புறுத்தியும் சமாதானம் அடையாத என் மகன் சங்கராத்மஜன், உயர் நீதிமன்றத்தில் வழக்குத் தொடர முடிவு செஞ்சி ருக்கார்...'' என்றார் ஆற்றாமையுடன்.

    ஆனால் இயக்குனர் பாலாவோ ''படம் குறித்து என்னிடம்தான் பேசியிருக்க வேண்டும். அதைவிட்டு நீதிமன்றத்துக்குப் போயிருக்கிறார். படங்களில் இடம்பெறும் கதாபாத்திரங்கள் கற்பனையே என்று டைட்டில் கார்டு போட வேண்டும் என்று சொல்வதற்கு இவர்கள் யார்?'' என்கிறார்.

   கடைசியாக கிடைத்த தகவலின் படி அம்பை நீதிமன்றதில் வழக்கு தொடரப்பட்டு, பாலா, ஆர்யா, படத்தயாரிப்பாளர், ஆகியோரை நீதிமன்றத்தில் ஆஜராகி விளக்கமளிக்கும்படி உத்தரவிடப்பட்டுள்ளது.

Thursday, June 23, 2011

''ரங்கநாயகி -ஜெயலலிதா' கவிஞர் வாலியின் அந்தர்பல்டி

      


       முந்தைய ஆட்சிக்காலத்தில் கலைஞருக்கு நடந்த பாராட்டுக்கூட்டங்களில் கவிஞர் வாலி வாசித்த கவிதைகள் உங்களுக்கு நினைவிருக்கிறதா?
அதில் தான் எத்தனை முகஸ்துதிகள். இவர் போன்றோர் அடித்த ஜால்ரா சத்தத்தில் தன்னை மறந்து தூங்கிய கருணாநிதி ஆட்சியை கோட்டைவிட்டார்.
அதிலும் குறிப்பாக வாலி கருணாநிதியை புகழ்ந்த கவிதைகளை ஒரு புத்தகமாக போடலாம். அதே நேரத்தில் முதல்வர் ஜெயலலிதாவை தாழ்த்தி, நக்கல்- நையாண்டி செய்வார்.
    அதே வாலி சமீபத்தில் ரங்கநாயகி  என்ற தலைப்பில் எழுதிய கவிதை கீழே.....

                                          ரங்கநாயகி!

இலங்கையில்

இது காறும் நடந்தது -
போர் அல்ல; தீவிரவாதப்
போக்கினை அறவே...

தூர்க்கவேண்டித்
துப்பாக்கிகளில் -
ரவைகளை நிரப்பியதாம்
ராணுவம்!
சொல்கிறார்
'சோ’;
நாம்
நாணுவம்!

...

குலைகள் நடுங்கத் - தம்
குடில்கள் வாயிலில்...

சம்மணம் இட்டுச்
சாதாரணமாய் இருந்தோரை -

அம்மணம் ஆக்கினான்; அதன்பின்
அவர்தம் ஆவி போக்கினான்;

முலை உரித்து - மதுரை
மூதூரெரித்த மரபினரின்-
கலை உரித்தான்;
கற்பை உரித்தான்; உயிர்
கவர்ந்து கொடுங்
காலனெனச் சிரித்தான்!...

இத்துணை
இழிசெயல்களை இயற்றியோன் -
சிங்களக் காடை; இராணுவச்
சீருடையணிந்த பேடை!

தீர்த்தம் குறையாத் தேம்சு நதித்-
தீரத்திலிருந்து...

செயல்படும்
'CHANNEL 4’எனும்
தொலைக்காட்சி -
ஆவணப் படுத்தி
அகில மெங்கும் காட்டியது-
கொடுமை மலிந்த - மேற்சொன்ன
கோரம் மிகுந்த கொலைக்காட்சி!

...

இதுகண்டு
இதயம் கனத்து-
இங்கிலாந்துப் பிரதமரும்;
இதர பிரஜைகளும்...

'அச்சோ!’ என
அலறுவதை அறியாதவரா என்ன
இச் 'சோ’?

...

'சோ’ வைப்போல் - இச்
சோகத்தை...
அறிந்தும்
அறியாததுபோல்-
அறிதுயிலில்
அயர்ந்திருப்பவர்...

ஸ்ரீரங்கம் - அருள்மிகு
ஸ்ரீரங்க நாதர்; அவர்-
படுத்தபடி - இலங்கையைப்
பார்த்திருக்கிறார் என்று-
பாடுகிறார் - தொண்டரடிப்
பொடிகள் என்னும் தாதர்!

...

ஸ்ரீரங்கம் - தீவு;
ஸ்ரீலங்கா - தீவு;
தீவைப் பார்க்கிறது
தீவு;
ஆனால்
அக்கிரமத்திற்கொரு-
தீர்வைப் பார்க்க வேண்டாமா
தேவு?

அய்யா!
அரங்கநாதரே! - நீர்
பாம்பின்மேல்
படுத்து - வெறுமனே
பார்த்திருந்தால்
பயப்படுமா இலங்கை? அதன்காலில்-
பூட்டவேண்டாமா
'போர்க்குற்றம்’ எனும் விலங்கை?

'அருளாதாரம் இன்றித் - தமிழரை
அழித்தொழித்தார்க்குப்-
பொருளாதாரம் இன்றிப்
போகக் கடவது!’ - என்று...

விரைந்து - நீர்
விதித்திருக்க வேண்டாமா தடை?
தூங்கிக்கிடக்கவா - உமக்கு
தோசை; நெய்ப்பொங்கல்; வடை?
...

ரங்க நாதரே! - உங்கள்
ரங்க நாயகி...
உலக
உயிர்க்கெலாம் தாய்;
ஈழத் தமிழனும் - அவள்
ஈன்றெடுத்த சேய்!

 'பொறுத்தது போதும்’ எனப்
பொங்கி எழுந்தாள்;
அவள் தாள்தான் - இன்று
அனைத்துத் தமிழரும் தொழுந்தாள்!

 சான்றோர்
சபையைக் கூட்டி-
'போர்க்குற்றம்’ எனக் கூறினாள்;
பொருளாதாரத் தடை கோரினாள்!

...

வாக்களித்த ஸ்ரீரங்கத்து மக்கள்
வாழ்த்துகிறார்கள் இன்று-
'எங்க நாயகி’தான் - அந்த
ரங்க நாயகி என்று!
 ----------------------------------



'' கொட நாடு
அது கொடா நாடு '

இது வாலி அன்று கலைஞருக்கு நடந்த பாராட்டுக்கூட்டத்தில் வாசித்த வரிகள்.
ஆட்சியாளரை புகழட்டும். ஆனால் தேவையில்லாமல் ஜெயலலிதாவை இகழ வேண்டுமா?
ஆட்சி மாறியதும் ''கொடா நாடு'' ''எங்க நாயகி'' ஆகிவிட்டது.


   இதை படித்ததும் ''இந்தியனில்'' கவுண்டமணி சொன்னது நினைவுக்கு வருகிறது.
   '' அந்தர்பல்டிடா சாமி ''

 
  

Friday, March 11, 2011

தலைவலிக்கு சிறந்த மருந்து

       காலையில் எழுந்திருக்கும் போதே தலை கிண்ணென்றிருந்தது. கண்ணை திறக்க முடியவில்லை. நேற்றிரவு ' நடுநிசி நாய்கள் ' பார்த்த பாதிப்போ என்னவோ. 
    '' ராதா ''வென கூப்பிட வாயெடுத்தேன். அதற்கு முன்பே மெல்லிய கொலுசொலி.
      தலைக்கு குளித்து சரியாக துவட்டாத கூந்தலின் நுனியில் ஈரம் சொட்ட, அப்போதே மலர்ந்த பூவாக அருகில் வந்து என் தலைக்கருகில் கட்டிலில் அமர்ந்தாள், என் முகத்தை ஒரு கணம் கூர்ந்து பார்த்தவள் '' என்னங்க தலைவலியா ? '' என்றாள் நான் சொல்லாமலே.
      மெல்லிய விரல்களால் சற்று சூடாக இருந்த என் நெற்றியை தொட்டாள். வைகறையில் பறித்த மல்லிகை இதழ்களால் தொட்டது போலிருந்தது. அவள் கையை என் நெற்றியுடன் அழுந்த பிடித்தேன்.
     '' நேற்று நல்லாத்தானே தூங்கினீங்க '' என்றவாறு என் தலையை மெதுவாக கோதினாள்.  கண்களை திறந்து அவள் முகத்தையே பார்த்துக் கொண்டிருந்தேன். வட்ட முகத்தில் சற்றே பெரிய கண்கள். கூரான நாசி .சிவந்த சிறிய ஆரஞ்சு சுளை போன்ற இதழ்கள். அவள் சிரிக்க நினைத்ததை கன்னக்குழியும் கண்களும் காட்டி கொடுத்தன.
    '' என்ன பார்வை ''
    '' இல்ல... பார்த்தால் பசி தீரும்னு சொல்வாங்க. தலைவலி தீருமான்னு தெரியல.''
    '' நிஜமாகவே தலைவலி தானா '' என்றாள் புன்முறுவலுடன். 
    '' தலை ரெம்ப பாரமா இருக்குடி ''
      சிரித்தவாறே என் நெற்றியில் அவள் கன்னம் அழுந்த என்மீது சாய்ந்தாள். ஈர கூந்தல் என் முகத்தில் படர்ந்தது. கன்னத்தின் குளிர்ச்சி என் நெற்றிக்கு பரவ, சோப் வாசமும் ஷாம்பு வாசமும் கலவையாக என் நாசியை வருட, அவள் மூச்சுக்காற்று லேசான சூட்டில் முகத்தில் பட எனக்கு என்னவோ செய்தது. கண்களை மூடி படுத்திருந்தேன். மெத்தென்று நெஞ்சில் சாய்த்துக்கொண்டாள். 
    '' இப்ப வலி குறையுற மாதிரி இருக்கு ''  நெஞ்சோடு சேர்த்தணைத்து முத்தமிட்டாள்.
    '' இன்னும் குறையுது.''
    '' டாக்டர் ஃபீஸ் என்ன கொடுப்பீங்க.''
    '' என் உயிரை கூட.''
    '' அச்சச்சோ.''.என் வாயை மூடினாள் முதலில் விரல்களால் .....  எத்தனையோ பெண்கள் அழகாக இருப்பார்கள். என்னவள் ராதா அழகு மட்டுமல்ல அன்பால் அழகை நூறு மடங்கு அதிகமாக்கியவள். 
      கொஞ்ச நேரம் தூங்கிவிட்டேன். ராதாவின் இதழ்கள் என் நெற்றியில் ஒத்தி பிரியும்போது தான் விழித்தேன். தலைவலி முற்றிலும் இல்லை.
     ''காபி தரவா ? '' என்று எழுந்து போனவள் சூடான காபியுடன் என்னருகில் வந்தாள். கால் இடரியதா என்னவென்று தெரியவில்லை காபியை என் முகத்தில் கொட்டிவிட்டாள். அம்மா!!!!!!!.....திடுக்கென முழித்துப் பார்க்கிறேன் முகத்தில் தண்ணீர். கையில் செம்புடன் என் மனைவி கனகா.
     ''காலையிலிருந்து நாயா வேலை பார்த்துட்டு இருக்கிறேன் இன்னும் என்ன தூக்கம்...பிள்ளைகளை ஸ்கூலுக்கு கிளப்ப வேண்டாமா. மனுஷனுக்கு கொஞ்சமாவது பொறுப்பு வேணும்....'' கத்திக்கொண்டிருந்தாள்.
      மீண்டும் தலை வலிப்பது போலிருந்தது. கண்களை மூடி ராதாவை தேடலானேன்.
  
     பின்குறிப்பு : மருத்துவ பதிவென்று படிக்க வந்தவர்கள் மன்னிக்கவும்

     பின்குறிப்பு 2 : இதை படித்து முடித்ததும் உங்களுக்கு லேசாக பெருமூச்சு வந்தால் ..''மனைவி அமைவதெல்லாம் இறைவன் கொடுத்த வரம்''


Monday, September 27, 2010

குஷ்புவுக்கு மட்டுமல்ல கோவில், என் நண்பனுக்கும்


குஷ்புவுக்கு மட்டுமல்ல கோவில் என் நண்பனுக்கும் 

     பத்தாம் வகுப்பு பொதுத் தேர்வெழுதிய பின், விடுமுறைக்கு நான் பிறந்த கிராமமாகிய பெருங்கோட்டூருக்கு பஸ் ஏறினேன். ஏற்றப்பட்டேன் என்று கூட சொல்லலாம். (சில பல காரணங்களால்😜 ).

 நண்பகலில் பெருங்கோட்டூரில் என்னை தள்ளிவிட்ட டவுன்பஸ் தடதடவென பின்னணி இசையுடன் புழுதியை வாரி இரைத்தவாறே சென்றது.( ஹீரோ எண்ட்ரி....! ).

   கிராமத்தில் இறங்கியதும் ஒரு நிசப்தம் என் காதுகளை தாக்கியது. மோட்டார் வாகன சப்தம், மனிதர்களின் ஓயாத பேச்சொலி இவற்றை பழகிய காதுகளுக்கு இந்த நிசப்தம் இதமாக இருந்தது.
ஊர்மடத்தில் ஒருக்களித்துப் படுத்திருந்த பெருசு, '' காரவீட்டு சங்காத்தா பேரந்தான! நல்லாருக்கீயா.?'' என பின்மண்டையை சொரிந்தவாறே குசலம் விசாரித்தது. வெள்ளந்தியான முகங்களையும் விசாரிப்புகளையும் கடந்து வீடு வந்து சேர்ந்தேன்.

  கிராமத்தின் வாழ்க்கை முறையே அலாதியானது. எனக்கு ரொம்பப் பிடிக்கும். அதிகாலை 5 மணிக்கெல்லாம் தெருவில் போகும் காளைமாட்டின் கழுத்து மணியோசை நம்மை எழுப்பிவிடும். விடிவதற்குள் காலைக்கடன் (ஆமா பெரிய ICICI பாங்க் கடன்....! ) கழிக்க குளத்தாங்கரைக்கு செல்ல வேண்டும். குளத்திலிருந்து திரும்பியதும் பாட்டி கொடுப்பாரே ஒரு கருப்பட்டிக்காப்பி,  முற்றத்தில் இருக்கும் ஆட்டு உரலில் அமர்ந்தவாறே அதை உறிஞ்சி குடிக்க அது ஈஸோபேகஸ் வரை இனிக்கும்

  குளிப்பதற்கு வயக்காட்டுக்குத் தான் போக வேண்டும். காலை பனித்துளி கால்களை நனைக்க வயல்வரப்பில் நடக்கும் போது மனதுக்கு ரெக்கை முளைக்கும். பம்புசெட் மோட்டார் தண்ணீரில் தலையைக் கொடுத்து குளிக்க தெறிக்கும் தண்ணீரில் வானவில் தோன்றும். குளித்துவிட்டு பசியோடு வீட்டுக்கு வரும் போது சூடான இட்டிலியும், பனியாரமும் காத்திருக்கும். வாழை இலையில் சூடான இட்லியையும் பொரிகடலை சேர்க்காத தேங்காய் சட்னியையும் வைக்க இட்லியின் சூட்டில் வாழை இலையும் கொஞ்சம் வெந்து இட்லியின் சுவையையும் மணத்தையும் அதிகமாக்க ஏலெட்டு இட்லிகள் பதவிசாய் உள்ளே போகும்.
ஆக காலை டிபன் முடிய பத்து மணியாகிவிடும். அதன்பிறகு தான் போரடிக்கும்.

  பத்து மணிக்கு மேல் வெட்டியாக இருப்பவர்கள் நானும் எதிர்வீட்டு நாய் மணியும் தான் ( நாய்க்கும் நம்ம பேரை தான் வச்சிருக்காங்க )

  அந்த நேரத்தில் அறிமுகமான நண்பர்கள் தான் கோட்டைச்சாமியும், முத்துப்பாண்டியும். முத்துப்பாண்டிக்கு பக்கத்து ஊர் உடப்பங்குளம்.

  எனக்கு சகல விஷயங்களையும் (!) கற்று கொடுத்தார்கள். நீச்சல், மரம் ஏறுவது, கவண் கொண்டு புளியங்கா அடிப்பது, எருமை மாட்டின் மேலேறி விழாமல் சவாரி செய்வது போன்ற அத்தனைக்கும் குரு இவர்களே.! மூன்று பேரும் சேர்ந்து பண்ணிய சேட்டைகள் இருக்கே. கொஞ்சநஞ்சமல்ல.
பொழுதுபோகவில்லை என்ற நிலை மாறி போதவில்லையானது.

 ஆலமரத்தடியில் கட்டப்பட்ட சிமெண்ட் திண்ணையில் உட்கார்ந்து கொண்டு அந்த வழியே தண்ணீர் எடுத்து கொண்டு போகும் மதினிமார்களை வம்பு இழுத்துக் கொண்டும் மர்பி டிரான்சிஸ்டரில் சிலோன் ரேடியோ கேட்டுக் கொண்டும் கழிந்த பொழுதுகள் அழியாத கோலங்கள்.

"தொடர்ந்து வருவது பப்பிசை பாடல்கள்" என்று அப்துல் ஹமீது அறிவிக்க கள்ளுக்கடை பக்கம் போகாதே காலைப்பிடித்து கெஞ்சுகிறேன் என்று சிலோன் மனோகர் பாட ஆரம்பித்தார்

''கள்ளு குடிச்சிருக்கியா மாப்ள'' முத்துப்பாண்டியை பார்த்து கேட்டேன்

''ம்ம் குடிச்சிருக்கேனே''

''நல்லா இருக்குமா''

"நல்லா எல்லாம் இருக்காது. கொஞ்சம் புளிக்கும் ஆனா போதையா இருக்கும்"

"போதைனா எப்படி"

"உடம்பிலிருந்து மண்ட தனியா இருக்கிற மாதிரி இருக்கும் காலெல்லாம் தானா நடக்கும்"

போதைனா எப்படி இருக்கும் என்ற ஆவல் எனக்குள் வேகமாக எழுந்தது. களவும் கற்று மற என்ற பழமொழிக்கு நியாயம் கற்பிக்க வேண்டாமா !

மறுநாள் காலை பனங்காட்டுக்குச் சென்றோம். இடுப்பில் மண்கலயத்தோடு பனை மரத்திலிருந்து இறங்கிய அந்தப் பெரியவர் "சுண்ணாம்பு பதநீ இல்லையேப்பா" என்றார்.

"பதநீ வேண்டாம் கள்ளு தான் வேணும்" என்றோம்

ஒரு நிமிடம் என் முகத்தை உற்றுப் பார்த்தவர் அடையாளம் கண்டு கொண்டார்

உங்களுக்கு கள்ளு கொடுத்தேன்னு  தெரிஞ்சது பெரியய்யா என் தோலை உரிச்சுடுவாக,

கண்டிப்பாக கள்ளு தரமாட்டார் என்பது உறுதியானதும் சோகத்தோடு வீடு திரும்புகையில் முத்துப்பாண்டி சொன்னான் "நாளைக்கு காலையில சீக்கிரமா போய் நாமளே கள்ள இறக்கி குடுச்சுடுவோம்"

மறுநாள் காலை ஆறு மணிக்கே போய் விட்டோம் பனை மரத்தில் ஏறி பழக்கம் இல்லை மூன்று பேருக்குமே. ஒவ்வொருவராக மாறி மாறி முயற்சி செய்து கடைசியாக நான் மனதில் கள்வெறியோடு  ஒருவழியாக பாதி ஏறிவிட்டேன் அதற்கு மேலே ஏற முடியவில்லை அதைவிடக் கொடுமை இறங்கவும் தெரியவில்லை. கடைசியாக மேலே இருந்து சர்ரென்று வழுக்கிக்கொண்டே கீழே வர வயிற்றில் உள்ள தோல் உரிந்ததும் விஷயம் கேள்விப்பட்ட தாத்தாவால் முதுகுத் தோல் உரிந்ததும் வரலாறு.




  இந்த நேரத்தில் தான் வரலாற்றை புரட்டிப்போட்ட ( ! ) சம்பவம்  நடந்தது.

 கோடை மழையால் ஏரி நிரம்பியிருக்க, நீந்தி குளிக்க போனோம். இளசுகளின் கூட்டம் களைகட்டியிருந்தது. மதகிலிருந்து சிலர் பல்டியடித்துக் கொண்டிருந்தார்கள். நீந்த தெரியாதவர்கள் கரையோரம் குளித்துக் கொண்டிருந்தார்கள். பொடியன்களின் ஹோ ஹோவென்ற சத்தமும் தண்ணீரில் தொப்பென்று குதிக்கும் சத்தமுமாக அந்த இடமே குதூகலமாக இருந்தது.

  இந்த நேரத்தில் தான் பக்கத்து ஊர் பையன்களுக்கும் எங்கஊர் பையன்களுக்கும் ஒரு போட்டி உண்டானது. மதகிற்கு இந்தப்பக்கம் குதித்து முங்கு நீச்சலில் மடையை கடந்து வாய்க்கால் பக்கம் வரவேண்டும். பந்தயம் பத்து ரூபாய். தண்ணீரில் மூழ்கி 100 எண்ணும் வரை தம் பிடிக்க கூடியவன், முங்கு நீச்சலில் வல்லவன் ஆகிய தகுதிகளை உடைய நம்ம முத்துபாண்டியை களமிறக்கினோம்.

  போட்டி ஆரம்பமானது. முத்துப்பாண்டி தண்ணீரில் குதித்து மூழ்கியதும் மனதுக்குள் ஒன்னு, ரெண்டு எண்ண ஆரம்பித்தேன். சிலர் இந்தப்பக்கம் நிற்க, எல்லாரும் வாய்க்கால் பக்கம் முத்துப்பாண்டி மேலலெழுவதை பார்க்க போனார்கள்.

  எண்ணிக்கை நூறை தாண்டிவிட்டது. முத்துப்பாண்டி மேலே வரவில்லை. நிமிடங்கள் அதிகமாக எல்லார் முகத்திலும் கலவரம். கோட்டைசாமி அழுதேவிட்டான். பெரியவர்கள் ஏரியில் குதித்து தேட ஆரம்பித்தார்கள். சாயங்காலம் வரை தேடுதல் நடந்துகொண்டிருந்தது. முத்துப்பாண்டி கிடைக்கவேயில்லை.

  இரவு மணி பத்து. மொட்டை மாடியில் படுத்திருந்த எங்களுக்கு தூக்கம் வரவில்லை. துக்கம் பாதி பயம் பாதி. முத்துப்பாண்டி பேயா வருவானோ !,அவனுக்கு  சொர்க்கம் கிடைக்குமா நரகம் கிடைக்குமா புலம்பியவாறே படுத்திருந்தோம். ''மணி ! '' என்றழைத்தவாரே யாரோ படியேறி வரும் சத்தம் கேட்டது. இருட்டில் லேசாக தெரிந்த உருவம் நெருங்கி வரவர தெளிவாக தெரிந்தது. அது முத்துப்பாண்டி....!!

  எங்களுக்கு சப்த நாடியும் ஒடுங்கி விட்டது. பேய் பயத்தில் நாக்கு ஒட்டிக்கொண்டு பேச்சே வரவில்லை. கோட்டைச்சாமி மெதுவாக காலை தொட்டு பார்த்தான்.

  ' 'என்னாடா காலை பிடிக்கிற ?''

  '' நீ சாகலையா.? ''

  விழுந்து விழுந்து சிரித்தபடி முத்து சொன்னான்
 '' நான் முங்கு நீச்சலில் வாய்க்கால் பக்கம் போய்ட்டேன்டா. வெளிய வரும்போது பார்த்தா, எங்க சித்தப்பா ! என்னை பார்த்திட்டார்னா அடி பின்னிருவார். அதான் திருப்பியும் முங்கி ஏரிப்பக்கம் மறுகரையில ஏறிட்டேன். என்னை யாரும் பாக்கலை. உங்க ரெண்டு பேரையும் கூப்பிட்டேன். உங்களுக்கும் கேட்கல. அப்படியே ஊருக்கு போய்ட்டேன். அப்புறம் நடந்த கூத்தை கேள்விப்பட்டு உங்களை பார்க்க வந்தேன். ''

  '' இப்ப என்னடா செய்றது ''

  '' நான் தான்னு யாருக்கும் தெரியுமா ?''

  '' தெரியாது ''

  '' அப்ப இத்தோட எல்லாத்தையும் மறந்திருவோம்.''


  மறந்தே போனோம். நான் மருத்துவரானேன். கோட்டைசாமி மிலிட்டரி போனான். முத்துப்பாண்டி சாஃப்ட்வேர் எஞ்சினியராகி அமெரிக்கா போய்விட்டான்.
பின் பலமுறை பெருங்கோட்டூர் போனாலும் ஏரிப்பக்கம் போக வாய்ப்பு அமையவில்லை.

  அண்மையில் போக நேர்ந்தது. அப்போது தான் பார்த்தேன் ஏரிக்கரையில் புதிதாக ஒரு சிறு கோயிலை. கூட நடந்து வந்துகொண்டிருந்த மாமாவை கேட்டேன்.
''உங்களுக்கு தெரியாது மாப்ள ! முப்பது வருஷத்துக்கு முன்னாடி ஒரு பையன் ஏரியில விழுந்து செத்துப் போய்ட்டான். அவன் நம்ம பூசாரி கனவுல வந்து எனக்கு கோயில் கட்டி கும்பிடுங்கன்னு சொன்னான். இப்ப ஏரிக்கரையில காவல் தெய்வமா இருக்கான். இந்த கோயிலை கட்டி ரெம்ப  வருஷமாச்சே ''

  கோயிலினுள் எட்டிப் பார்த்தேன். சிலையில் முத்துப்பாண்டி முகம் தெரிகிறதாவென்று !!

  முத்துப்பாண்டிக்கு மெயில் அனுப்ப வேண்டும்,தமிழ்நாட்டில் குஷ்புவுக்கு மட்டுமல்ல உனக்கும் கூட கோவில் இருக்கிறதென்று.......



Saturday, September 18, 2010

மாரடைப்பு - HEART ATTACK -தெரிந்து கொள்ள வேண்டியவை



இந்தியர்களை அதிகம் தாக்கும் நோயாக மாறியுள்ள மாரடைப்பை பற்றி தெரிந்துகொள்ளவே இந்த பதிவு.

இதயத் தசைகளுக்கு செல்லும் இரத்தகுழாயில் அடைப்பு ஏற்படுவதையே மாரடைப்பு - HEART ATTACK - ACUTE MYOCARDIAL INFARCTION - என்கிறோம்.


எந்த வயதில் மாரடைப்பு வரும்...?

முன்பெல்லாம் 50-ஆக இருந்த மாரடைப்பு வரும் சராசரி வயது, நமது பழக்கவழக்கங்களின் காரணமாக வெகுவாக குறைந்துள்ளது. சமீபத்திய, நடிகர் முரளியின் மரணமே சான்று. கடந்த 3 வருடங்களில், 45 வயதிற்குள்ளாக மாரடைப்பு ஏற்படும் எண்ணிக்கை 5 மடங்கு அதிகறித்துள்ளது. பெண்களுக்கு பொதுவாக மாதவிலக்கு நிற்கும் காலம் வரை இந் நோய்க்கான சாத்தியகூறு குறைவு.

மாரடைப்பிற்கான அறிகுறிகள்

நெஞ்சின் மைய பகுதியில் வலி ( கவனிக்க - சினிமாக்களில் காண்பிப்பது போல இடது பக்கத்தில் அல்ல ) இருக்கும்.
வலியானது தொண்டை, கீழ்த்தாடை, தோள் பகுதிகளுக்கு பரவுவது போல தெரியும். சிலருக்கு வலியை விட எரிச்சல் அதிகமாக இருக்கும். இதை அஜீரணம் என தவறாக எடுத்துக் கொள்வர்.

அதிகமான வியர்வை இருக்கும். வாந்தி குமட்டல் இருக்கலாம்.

நெஞ்சில் ஒருவிதமான அசௌகரியம், (discomfort) படபடப்பு, போன்றவை மாரடைப்பின் அறிகுறியாக இருக்கலாம்.

நீரழிவு (diabetes) நோயுள்ளவர்களுக்கு வலியில்லாத மாரடைப்பு (silent infarction) எற்படும். வியர்வை மட்டுமே இருக்கும் - வலி கொஞ்சம் கூட இருக்காது.

மேலும் வேகமாக நடக்கும் போது, படிகளில் ஏறும் போது நெஞ்சில் வலி ஏற்படுவது - நின்றவுடன் வலி குறைவதுவும் இதய வலி (angina) தான்.

மேற்சொன்ன அறிகுறிகள் சிலருக்கு மாறுபடலாம்.

காரணங்கள்

நீரழிவு நோய், அதிக இரத்த அழுத்தம், இரத்ததில் அதிக கொலஸ்டிரால், புகைப்பழக்கம் ஆகியவை முக்கிய காரணங்களாகும்.

நெஞ்சுவலி வந்தவுடன் என்ன செய்ய வேண்டும்.?

மேற்சொன்ன அறிகுறிகள் ஒருவருக்கு தென்பட்டால் அவரை அப்படியே படுக்க வைக்க வேண்டும். ஒரு அடி கூட அவர் நடப்பது நல்லதல்ல.
SORPITRATE 5 mg மாத்திரையை நாக்கிற்கு அடியில் வைக்கலாம். மிக விரைவாக நல்ல மருத்துவமனைக்கு கொண்டு செல்லவும்.

சில தவறான கணிப்புகள்

''காலையில் ரெண்டு பஜ்ஜி சாப்பிட்டேன் அதிலிருந்து நெஞ்சு எரிஞ்சுகிட்டே இருக்கு. லேசா வியர்க்குது '' என்ற ஒருவருக்கு ECG எடுத்து பார்க்கும் போது அவருக்கு மாரடைப்பு இருப்பது தெரியவந்தது. அவரது வியர்வையே நோய்கணிப்பிற்கு எனக்கு உதவியது. எனவே நெஞ்சுவலி இல்லாவிட்டாலும் கூட எரிச்சல், வியர்வை இருந்தால் அது மாரடைப்பாக இருக்கலாம்.

அதே போல் சர்க்கரை நோயாளிகளுக்கு எப்போதாவது HYPO GLYCEMEA எனப்படும் இரத்த சர்க்கரைகுறைவு எற்படும். அச்சமயம் படபடப்பு, லேசான வியர்வை எற்படும். இதில் அனுபவபட்டவர்கள் மாரடைப்பு ஏற்படும் பொழுது கூட அதை  HYPO GLYCEMEA என தவறாக கணித்து ஜீனியை சாப்பிட்டுக்கொண்டு இருப்பார்கள். எனவே நீரழிவு நோயினருக்கு அதிக வியர்வை ஏற்பட்டால் அது மாரடைப்பாக இருக்கலாம் என கவனத்தில் கொள்ள வேண்டும்.

வராமல் தடுக்கும் வழி என்ன?

மாரடைப்பு ஏற்பட்டு மருத்துவமனையை அடையும் முன்பே இறப்பவர்கள் 20%. மருத்துவமனையில் இறப்பவர்கள் 20% என்றெல்லாம் புள்ளி விபரங்கள் சொல்கின்றன. இந்நோய் வராமல் தடுப்பது அவசியமாகும்.

தினமும் ஒரு மணி நேரமாவது ஓரளவு வேகமாக, நன்கு வியர்க்கும் படி நடக்க வேண்டும்.

சர்க்கரை நோயாளிகள் FASTING BLOOD SUGAR -110 mg% -க்கு அதிகமாகாமல் பார்க்க வேண்டும்.

கொலஸ்டிரால், இரத்த கொதிப்பு அதிகமுள்ளவர்கள் இவைகளை கட்டுபடுத்தவேண்டும்.

புகை பழக்கத்தை முற்றிலும் கைவிட வேண்டும்.

மன அழுத்தத்தை குறைக்க தியானம், யோகா செய்யலாம்.

சுருக்கமாக எழுதிவிட்டேனென்று எண்ணுகிறேன். ஏதேனும் சந்தேகம் இருந்தாலோ, விளக்கம் வேண்டுமானாலோ பின்னூட்டம் இடுக.! பதில் எழுதுகிறேன்.

Monday, September 6, 2010

பதிவுலகில் சாதனை- ஒரு மணி நேரத்தில் 100 வோட்டுகள் .




தனது முதல் பதிவை வெளியிட்டு ஒரு மணி நேரத்திலேயே இன்ட்லியில் 100 வோட்டுக்கள் பெற்று சாதனை புரிந்த மதுரையை சேர்ந்த புண்ணாக்குபாண்டி_யிடம் நமது நிருபர் எடுத்த பேட்டி.....

'' புண்ணாக்குபாண்டிங்கறது உங்க உண்மையான பெயரா.? ''

'' இல்லீங்க..எம்பேரு அழகர்சாமிங்க. நமக்கு புண்ணாக்கு வியாபாரம். அதனால எல்லாரும் என்னை புண்ணாக்குபாண்டின்னு கூப்புடுவாங்க. அந்த பேரையே நம்ம பிளாக்குக்கு வச்சிடேங்க. ''

'' நீங்க என்ன படிச்சிருக்கீங்க? ''

'' ஆறாப்பு பாஸுங்க. பிற எப்பிடி இதெல்லாம்னு நினைக்கீங்களா ? .நமக்கு எல்ப்புக்கு ஒரு அசிட்ட்ண்ட் போட்டிருகேன். ( என்னது.. அசிட்டண்டா..?...ஓ அசிஸ்டண்டா...!) பன்னெண்டாப்பு படிச்சிருக்கான். டேய்.. முருகா ஐயாவுக்கு வணக்கம் போடுப்பா ''  '' வணக்கம்னே '' ( இது வேறயா )

'' ஒரு மணி நேரத்தில 100 வோட்டு வாங்கற அளவுக்கு அப்படி என்ன எழுதினீங்க? ''

'' நெறய எழுதனும்னு நெனைச்சேன். ஆனா சுவிச்சு போடுல இருந்து ஒவ்வொரு சுவிச்சா தேடி அமுக்கி எம் பேர எழுதறதுக்கே ஒரு மணி நேரம் ஆயிருச்சு. சரி போதும்னு விட்டுட்டேன். '' ( அடப்பாவி .! கீபோர்ட சுவிச்சு போடுங்கறான். கீய சுவிச்சுங்கறான். இன்னிக்கு யார் முகத்தில முழிச்சேன்னு தெரியலயே .!)

'' இந்த பதிவுக்கு எப்படி 100 வோட்டு? ''

'' ஒரு வோட்டுக்கு 200 ரூபா குடுத்து போடச்சொன்னேன். அப்பத்தான் பேமசாகுமாம், எல்லாரும் படிப்பாய்ங்கலாம். முருகன் தான் சொன்னான். எப்பிடி...!!.. மதுரக்காரய்ங்கன்னா சும்மாவா !..( ஆஹா இப்பவே கண்ண கெட்டுதே..)

'' வேறென்ன பிளான் வெச்சுருக்கீங்க?  ''

'' யாருமே கமண்ட்டு எழுதலயாம். அதனால ஒரு கமண்ட்டுக்கு 150 ரூபா பிக்ஸ் பன்னீருக்கேன். ( டேய் ரெம்ம்ப ஓவரா போற...! )

'' இவ்வளவு செலவு பண்ணி பிளாக் ஆரம்பிச்சதோட நோக்கம் என்ன.? ''

'' இதுல தான் யாரனாலும் திட்டலாமாமே. .புண்ணாக்கு வாங்கிட்டு பணம் கொடுக்காதவய்ங்க, கடன் வாங்கிட்டு திருப்பி கொடுக்காதவய்ங்க, எல்லாத்தையும் ஆத்தா அக்கான்னு திட்டப்போறேன். ( என்ன ஒரு வில்லத்தனம்.....! )

'' பதிவுலகத்துக்கு என்ன சொல்ல போறீங்க? ''

'' என்னது பதிவுலகமா.? இதென்ன புதுசா இருக்கு.!.நம்ம இந்தியாவ விட பெரிய உலகமா.?..''

'' !!!!!????@#$%!!!!!! ''

'' முருகா..! ஐயா களப்பா இருக்க மாதிரி தெரியுது.. சில்லுனு ஒரு ஜிகர்தண்டா கொடுப்பா ''

Friday, September 3, 2010

இப்படியெல்லாமா நடக்கும்- just for fun -(18+)

  ஒரு மருத்துவனின் கடமை நோயாளியை குணமாக்குவது மட்டுமே!...அது எந்த மருத்துவ முறையில் என்பதல்ல. அலோபதியோ, சித்தாவோ, ஹோமியோபதியோ, அல்லது சிரிப்போபதியோ...!
 
 முதலில் சிரிப்பில் ஆரம்பிப்போம்.

                             சொர்க்கமா நரகமா

 இறந்தவுடன் மேலோகம் செல்லும் சித்த, அலோபதி, ஹோமியோபதி மருத்துவர்கள் மூவர் கடவுளின் திருச்சபையில் தண்டனைக்காக காத்திருக்கிறார்கள்

அவர்களிடம் கடவுள் ''உங்களிடம் ஒரு கேள்வி கேட்பேன். சரியான பதிலைச் சொன்னால் சொர்க்கத்துக்கு போகலாம். இல்லையென்றால் நரகம் தான்'' என்றார்.

  முதலில் சித்த மருத்துவரிடம் ''சில வருஷங்களுக்கு முன்னால் ஒரு சொகுசு கப்பல் கடலில் மூழ்கியதே .! அதன் பெயர் என்ன ? '' என்றார்.

  ''டைடானிக்''

  ''சரி, நீ சொர்க்கத்துக்கு போ''

  அடுத்து ஹோமியோபதி மருத்துவரிடம் '' அந்த கப்பல் மூழ்கியதில் எத்தனை பேர் இறந்தார்கள் ? ''

  '' 1517 ''
  
  ''சரி, நீயும் சொர்க்கத்துக்கு போகலாம் ''.

  அடுத்து அலோபதி மருத்துவரிடம் கேள்வி கேட்டார் கடவுள்

 '' இறந்தவங்க பெயரெல்லாம் வரிசையாக சொல்லு..?..''

  ( இதை எழுதியதும் என் மனைவியை படிக்க சொன்னேன். படித்துக்கொண்டிருக்கிறார்.. என்ன சொல்கிறார் என்று பார்ப்போ........நோ.!.... பேச்சு பேச்சாத்தான் இருக்கனும் ஆமா.....! 
              பின் குறிப்பு; என் மனைவி ஒரு அலோபதி மருத்துவர் )


                            கேட்க கூடாத கேள்வி(18+) 



 தங்களது 25ஆவது திருமண நாளை கொண்டாடிய கணவர் ( தாத்தா ) தன் மனைவியிடம் கேட்டார்

  ''நமக்கு கல்யாணமாகி 25 வருஷமாச்சு. இத்தனை வருஷத்தில நீ எப்போதாவது வேற ஆம்பளையோட தப்பு பண்ணியிருக்கிறியா.?.அப்படி இருந்தாலும் பரவாயில்லை சொல்லு. நான் கோவிச்சுக்க மாட்டேன்.''

  சற்று தயக்கத்துடன் மனைவி '' ஆமா , மூன்று தடவை மட்டும்.'' என்றார்.

  ''பரவாயில்லை சொல்லு''

  ''ஒரு தடவை நீங்க எதிர் வீட்டுக்காரரை அடிச்சுடீங்கல்ல. அப்ப உங்களை அரஸ்ட் பண்ணின இன்ஸ்பெக்டர், FIR போடாம, உடனே உங்களை வீட்டுக்கு அனுப்பினாரே எப்படின்னு நினைக்கிறீங்க ..''

  ''ஓகோ அதான் மேட்டரா.! சரி இது எனக்காக தானே பண்ணின.!.பரவாயில்ல...அடுத்து..?''

 ''உங்களுக்கு அப்பன்டிஸைடிஸ் வந்தப்ப, பணம் கட்டினால் தான் ஆபரேஷன் செய்வேன்னு சொன்ன டாக்டர், பணம் வாங்காமலேயே ஆபரேஷன் பண்ணினாரே எப்படி...!..''

  ''இது துரோகம் இல்லை. தியாகம். சரி... மூனாவது..?.''

  ''நீங்க ரோட்டரி கிளப் பிரசிடெண்ட் எலெக்ஷனில் ஜெயிக்கறதுக்கு 200 வோட்டு குறைவாகத் தானே இருந்தது. ஆனா ஜெயிச்சீங்களே எப்படி...!''

  ''...???!@#$%^&**........''  
 
 (எப்பூடி..!!!!)

  (கடை விரித்தேன், கொள்வாரில்லை. சரக்கை மாற்றி பார்ப்போமே. என்று தான்..)


  

Friday, August 27, 2010

அடிச்சாம்பாரு அப்பாயின்மெண்ட் ஆர்டர்.

  ''கால் காசானாலும் கவெர்மெண்ட் காசு வாங்கனும்'' என்று எங்க அப்பத்தா அடிக்கடி சொல்லும். நானும் காலேஜ் முடிச்சதிலிருந்து பலமுறை TNPSC எழுதிவிட்டேன். அரசு மருத்துவராகும் வாய்ப்பு கிடைக்கவில்லை. ஜாதகத்தில் அரசு வேலை யோகமில்லை என்று இடைகால் ஜோசியன் சொல்லிவிட்டான். அதோடு கிளினிக் வருமானம் போதுமானதாக இருந்ததால் முயற்சியை கை விட்டேன்.

  எனது முயற்சி கடவுளுக்கு தெரிந்ததோ இல்லையோ கவெர்மெண்ட்டுக்கு தெரிந்துவிட்டது... அடிச்சாம்பாரு அப்பாயின்மெண்ட் ஆர்டர்.....
 EMPLOYMENT SENIORITY மூலம் வேலை வந்தது. விழுப்புரம் மாவட்டம், கோண்டூர் அரசு ஆரம்ப சுகாதார நிலையத்தில் சித்த மருத்துவ ஆலோசகராக.

  நான் இருப்பதோ தென்காசி. விழுப்புரத்திலிருந்து சுமார் 500 கிமீ தூரம். இதை விட கொடுமை சம்பளம். துவக்க பள்ளி ஆசிரியர் சம்பளத்தில் பாதி. கொத்தனார் சம்பளத்தை விட சற்று அதிகம். உண்மையில் அப்பத்தா சொன்ன கால் காசு தான். மாதம் 12,000 ரூபாய்.

   இருந்தாலும், அப்பத்தா ஆன்மாவை சாந்தி செய்வதற்காகவும், போலீஸின் மிகவும் தேடப்படுபவர் (MOST WANTED) லிஸ்டில் முதலிடத்தில் இருப்பதாலும்  விழுப்புரம் செல்வதென தீர்மானித்தேன்.

  கோண்டூரை தேடி கண்டுபிடிப்பதற்குள் பெரும்பாடாகிவிட்டது. ஒரு வழியாக பாண்டிச்சேரிக்கு பக்கத்தில் ஒழித்து வைக்கப்பட்டிருந்த கிராமத்தை கண்டுபிடித்து வேலையில் சேர்ந்தேன்
.
  சித்த மருத்துவ பிரிவிற்காக கக்கூஸை விட கொஞ்சம் பெரிய அறை ஒன்றை ஒதுக்கியிருந்தார்கள். அதில் நானும் பார்மஸிஸ்ட்டும் ஒருவரை ஒருவர் இடித்து கொள்ளாமல் சமாளித்தோம். தினமும் நாலு பெருசு தைலம் வாங்க வரும். அதில் ஒன்று தேய்த்து விட சொல்லி கடுப்பேற்றியது. தினம் வரும் ஏழு கேசை ஏழுபதாக காண்பித்து சாதனை ( ! ) புரிந்தேன்

    மற்ற மாவட்டங்களை போலல்லாமல்  விழுப்புரம் மாவட்டத்திற்கு மட்டும்  மூன்று DSMO .ஒருவர் Dr.பார்த்திபன் மற்ற இருவர் CLERK-1, CLERK-2. இவனுங்க அலும்பு தாங்க முடியாது.

  மாதமொருமுறை நடக்கும் DSMO MEETING -ல் NRHM மருத்துவர்களை நடத்தும் விதம் -...முடியல!!!...

  முடிவில் ஒரு சாம்பார் சாதம் கொடுப்பார்கள். ரெண்டு நாட்களுக்கு நம் மனதை விட்டு போகாது. ஏப்பமெல்லாம் சாம்பார் வாசம். அந்த மெனுவை இப்ப மாற்றிவிட்டார்களா தெரியவில்லை.

  ஒருமாதம் கழிந்தது. முதன்முதலாக கவெர்மெண்ட் காசு வாங்கும் ஆர்வத்தில் அலுவலகத்தை அணுகினால், '' சம்பளமா ! .'' இன்னும் ரெண்டு மாசம் கழிச்சு தான் வரும் '' என்றார் கிளார்க். ..என்ன கொடுமை சார்.!....

 கோண்டூர் PHC யும், பாண்டிச்சேரி நண்பன் நெப்போலியன் அறையுமாக ( சத்தியமா நண்பன் பெயர் தான் நெப்போலியன் ) அடுத்த இரண்டு மாதங்கள் கழிந்தன. ஒரு இனிய காலை பொழுதில் அலுவலகத்தில் இருந்து தொலைபேசி  அழைப்பு!. ''சார் ! சம்பளம் வந்து வாங்கிக்கங்க ''

  அவசரமாக கிளம்பி பஸ் ஸ்டாப்பில் நின்று கொண்டிருந்தேன். சனியன், மஞ்சள் கலரில் மூன்று கால்களுடன் (ஆட்டோ என்ற பெயரில்) என் பின்னாடி வந்ததை நான் கவனிக்கவில்லை. ஒரே இடி..!.. கண் விழித்து பார்க்கும் போது மருத்துவமனை அறை மங்கலாக தெரிந்தது . டாக்டர் சொல்லிக்கொண்டிருந்தார்.
  '' ஸ்பைனல்கார்டு இஞ்சுரி .மூன்று மாதம் பெட் ரெஸ்ட் எடுக்கணும். என்னவோ கால் காசு கவெர்மெண்ட் காசுன்னு உளறிக்கிட்டு இருந்தார். அதனால தலைக்கு சிடி ஸ்கேன் எடுத்திருங்க.!!!!...

Tuesday, August 24, 2010

ஊசி போடவா.. வேண்டாமா..

சில தினங்களுக்கு முன், சித்த மருத்துவ பட்டதாரிகள் தங்கள் மருத்துவ முறையுடன் ஆங்கில மருந்துகளையும்(allopathy) உபயோகிக்கலாம் என உயர்நீதிமன்றம் தீர்ப்பளித்தது. இதை ஏற்காத ஆங்கில மருத்துவர்களுக்கும் பொது மக்களுக்கும் சில விளக்கங்கள்.

 சித்த மருத்துவத்திற்கென பட்ட படிப்பு துவங்கும் காலகட்டத்தில் சித்த மருத்துவ பட்டதாரிகள் ஒரு முழுமை பெற்ற மருத்துவர்களாக விளங்க வேண்டும் என்ற எண்ணத்தில் ஆங்கில மருத்துவ பாடங்களான anotomy, physiology, biochemistry, clinical pathology, pharmacology ..etc ஆகியவற்றை பாட திட்டத்தில் சேர்த்தார்கள். ஆகவே நாங்களும் முறையாக படித்தவர்கள், பயிற்சி பெற்றவர்கள்.

 மேலும் நாங்கள் முழுவதுமாக ஆங்கில மருத்துவ முறையில் பிரக்டீஸ் செய்யவில்லை. சில தருணங்களில் உதாரணமாக அதிகமான வலி, ஒவ்வாமை, (emargencg, shock, allergy, ureteric colic) போன்ற அவசர காலங்களில் மட்டும் அலோபதி மருந்துகளை பயன்படுத்த வேண்டியுள்ளது.

 நமது நாடு பெரும்பகுதி கிராமங்களால் ஆனது. ஆனால் கிராமங்களுக்கு மருத்துவ வசதி சரியாக கிடைப்பதில்லை. அலோபதி மருத்துவர்கள் நகரங்களையே நாடுகிறார்கள். நாங்கள் பெரும்பாலும் கிராமங்களில் சேவை செய்கிறோம்.

 இத்தனை நியாயங்கள் எங்களிடம் இருந்தும் ஏற்காத IMA தரப்பினர் அடுத்த உள்குத்துகளை துவங்கியிருக்கிறார்கள். ..உங்கள் நோக்கம் தான் என்ன?..
 ஐந்தரை வருடம் மருத்துவ கல்லூரியில் படித்த எங்களை போலி மருத்துவர் என்று போலீஸ் மூலம் கைது செய்தீர்கள். பல போராட்டங்களுக்கு பிறகு மீண்டு வந்தோம். மறுபடியுமா!....வேண்டாம் ..இத்தோட நிறுத்தி கொள்வோம்..
 ( ரொம்ப சீரியசா எழுதீட்டமோ !..........)

 இந்த பிரச்சனைகளால் மிகுந்த மன உழைச்சலுக்கு உள்ளான Dr.அருண் ஒரு யோசனை சொன்னார். நந்தி மை, ரசகந்தி மெழுகு, போன்ற எங்கள் மருந்துகளை உங்களுக்கு தருகிறோம். பதிலாக diclo, paracitamol, மற்றும் சில antibiotics களை நாங்கள் பயன்படுத்திக்கொள்கிறோம். (..உக்காந்து யோசித்திருப்பாரோ?..) இதிலிருந்து அவரது மனநிலை பாதிப்பை நீங்கள் தெரிந்து கொள்ளலாம்.
 ..........பட்...இந்த டீலிங் எனக்கு ரொம்ப பிடிச்சிருக்கு..

 கடைசியாக ஒன்றை சொல்லிக்கொள்கிறேன். ஜெயிலுக்கெல்லாம் போயிட்டு வந்திருக்கிறோம். கொஞ்சம் பாத்து போட்டு கொடுங்க!........

இதை படிக்கும்  சித்த மருத்துவர்கள்  ஓட்டு போட்டு இந்த பதிவை மற்றவர்களும் படிக்கும் படி செய்யவும்